慢必同志吧 遇多嘴醉政協

【明報專訊】人民力量陳志全（慢必）做咗立法會議員一年，笑言繼續做自己，平時出街一樣會著短褲、踢拖，談到感情時，慢必坦言仍係單身，仲向Emily透露間中都去某同志酒吧消遣，早排撞到一個男政協委員，對方飲到醉醉地竟然捉住佢，一時問佢點解要反中亂港、一時就多謝佢為同志爭取權益，講咗半個鐘都唔停，最終慢必要搭的士離開甩身。


慢必話以前係娛樂圈中人，家係議員，去到同志酒吧都有唔少人認得佢，有人會好nice咁請佢飲杯酒，亦有人當面講，感謝佢為大家爭取權益，但有時都難免遇到較難纏嘅人，經歷唔算開心。


議員身分令有心人卻步

慢必坦言議員的身分，令部分有潛質發展嘅人對佢卻步，甚至普通男友人會擔心同佢出街畀人影相，但佢相信只要遇到真命天子，對方唔會介意，佢亦願意為對方「返屋企食飯」，等對方唔使咁顧忌。