議員遊巴黎賊影處處

【明報專訊】何俊仁險認賊作支持者

多名議員應國泰邀請去法國幾日，其中喺巴黎有1日，但多個團友都差啲畀人打荷包，好似民主黨何俊仁、獨立嘅馬逢國、行會成員鄭耀棠嘅老婆等，好彩最終力保不失。


有同行議員形容巴黎治安好差，記得何俊仁喺街上散步時，有外國人行埋去同仁哥握手，仁哥諗住自己去到歐洲都有支持者，點知對方係賊，諗住借機行近啲偷嘢，好彩無得手。有賊人更明目張膽，等佢哋一班人過馬路想搶手袋；或者佢哋搭地鐵時，走埋去問時間分散注意，同黨就乘機博懵偷嘢，但班議員都唔蠢，一係就大嗌、一係就推開佢哋。


馬逢國批踭擺脫扒手

馬逢國好淡然咁同Emily講，呢啲事喺歐洲唔同地方時有發生，佢當年從事電影業，不時都要去法國，都會遇到扒手，今次佢哋行緊條窄路時，就有「途人」問佢走埋去攞簽名，其實係打算「伸手行事」，佢形容對方未埋到身，佢已經甩開佢哋，所以力保不失，據講當時佢見勢色唔對，就批踭令對方知難而退。