成員「消失」 食衛局出稿蝦碌

【明報專訊】食物及衛生局噚日公布咗檢討醫管局制度嘅督導委員會20個成員名單，成員包括醫療界、社福界同商界代表等，但食衛局出新聞稿時錯漏唔少，如「漏咗」安老事務委員會主席陳章明，令原本13人嘅非官方成員得番12人，食衛局長高永文見記者時解釋話，因為陳教授早前離開咗香港，佢哋聯絡唔到，所以新聞稿冇提到陳章明，但啱啱聯絡到佢之後就即刻補充。


「麥建華」變「麥健華」

除咗陳章明教授之外，新聞稿原先提及成員仲有「麥健華博士」，但Emily搵咗好耐都唔知呢位博士乜嘢來頭，之後先發現食衛局將「建」字打錯咗做「健」字，呢位成員其實係擅長人力資源嘅馬會公司事務執行總監麥建華，食衛局發現出錯後，噚晚都急急再出稿更正。