擬九西開地區辦

【明報專訊】有7名立會議員嘅經民聯作為商界政黨，總部位於金鐘海富中心，入咗伙幾個月，噚日首次請傳媒上去飲杯茶傾吓偈，講吓佢哋嘅工作。經民聯成立未夠一年，但已經有20幾個區議員遍佈全港五大區，至於地區辦事處，目前只得新界東同新界西有，而梁美芬喺九龍西，唔知經民聯係咪要幫佢鞏固勢力，佢哋下個目標就要喺九龍西開辦事處。


經民聯議員同記者茶敘，梁君彥、林健鋒、梁美芬、石禮謙同張華峰都有到場，至於劉皇發，據講跟咗民建聯陳鑑林去潮州玩幾日，但同屬經民聯嘅囝囝劉業強就有現身茶敘。


經民聯主席梁君彥話，喺新界兩區嘅地區工作積極展開，包括喺沙田開設「惠食舍」，平價售賣食物、日用品畀街坊，未來打算將地區工作擴至九西，包括開辦事處，正物色地方，如果地區工作搞得好，相信若梁美芬再競逐連任，支持佢嘅地區力量都不容忽視。