CY 落區 中圖唔夠安全

【明報專訊】特首梁振英（CY）9月將會再落區，今次係港島，之前有說論壇地點會係銅鑼灣中央圖書館，不過Emily聽聞有關方面評估中圖環境後，覺得中圖嘅安全系數唔夠高。場地再有變數，唔通要喺港島搵個安全嘅地方真係咁難？


禮頓山會堂外街道嫌窄

9月地區論壇究竟會喺邊度搞，一直眾說紛紜，最先估計會喺跑馬地禮頓山社區會堂，因為以往唔少官方活動都喺嗰度搞。不過，據聞禮頓山社區會堂前排已被剔出安全名單，主因係嗰度大門外嘅街道太窄，易生混亂。據聞，上年年底《施政報告》地區諮詢會，就因而轉去柴灣青年廣場。至於今次落區會去邊、會唔會去番柴灣青年廣場、同行有咩官員，Emily噚日問特首辦，都係嗰句﹕「詳情有待公布。」