青年學設計 睇清宮服偷師

【明報專訊】尖沙嘴香港歷史博物館舉行緊「國采朝章——清代宮廷服飾」展覽，康文署為咗配合展覽，邀請咗時裝設計師張路路主持創意工作坊，向一班16到25歲後生仔介紹清朝唔同時期、身分嘅宮廷服飾設計同風格。有參加者話透過張老師講解，學識仔細欣賞衣服設計，最重要係可以從唔同角度了解設計嘅深層意義。


張路路話，一班後生仔對展品觀察入微，仲可以發現一啲佢都未有留意嘅地方，令佢好驚喜。今次展覽會去到10月7號，康文署仲會喺9月10號同24號舉行多兩場工作坊，邀請設計師、廣告人同形象指導，講吓觀眾可以點樣觀賞展品同了解當時嘅審美觀，有興趣者可去網頁報名（http://www.lcsd.gov.hk/CE/Museum/History/b5/online.php），或打2724 9019查詢。