社運界籌錢登報促換特首

【明報專訊】特首梁振英（CY）放緊大假去咗海外，但倒梁人士就趁佢唔喺度積極行動。民間團體同社運界人士，前晚就喺facebook發起一人捐一百蚊，話要喺報紙登廣告要求換特首，佢哋認為CY上任一年香港赤化日深，要抗融合、拒赤化、反盲搶地，還香港人一個家，換特首係唯一出路。


特首辦未回應

Emily見到有網民出動到集資登廣告要求CY落台呢招，當然要問吓特首辦有咩回應，不過唔知係咪因為CY放緊假，今次CY無出聲明之餘，特首辦至截稿前都係暫無回應。


首批聯署人唔少都係關注本土議題同東北發展嘅人，包括新民主同盟范國威、公民黨毛孟靜、環保觸覺譚凱邦等。譚凱邦就話，今次集資嘅參加者全部以個人身分參與，前日先開event，今日就有過200人表示會加入，反應都算係咁，而暫時未知籌到幾多錢。


網民：不如登《南都》

譚凱邦話佢哋嘅目標至少籌到1萬蚊，喺一份報章登廣告，最高目標係籌5萬，登3份報章，有網民仲建議佢哋不如衝出本地報章，喺內地《南方都市報》登廣告，向內地發聲表達不滿。


CY會休假到29號，30號返工，而反梁廣告就計劃喺佢返工第一日或第二日刊出，當係「歡迎」佢返回崗位。