余若薇享受做大狀

【明報專訊】公民黨主席余若薇（Audrey）無做立法會議員之後，主要專注做大律師生意，官司做到無時停，Emily前排見到Audrey就發現佢啲白頭髮的確比以前多咗，唔知係咪用腦用得多呢？Audrey笑笑口話佢非常滿意家用腦嘅程度，至於白頭髮佢好睇得開，仲同Emily講白髮去到某個年紀就有㗎啦！

Audrey話，喺法庭打官司，只要努力及用腦就有機會可以扭轉結果，唔似得以前喺立法會嘅辯論，只係得個講字，「永遠無結論」，所以佢好滿意家嘅工作，「用腦筋滿意程度好好多」。


言下之意係咪覺得之前做議員好大損失？Audrey話時間過咗就係過咗，不過「時間從來都唔會係嘥」。一句講晒，做議員同大狀各有各好！


幫二女辦婚禮

Audrey手上仲有另一大project，就係籌辦二女月底婚禮。唔少人都對自己婚禮有好多要求，Audrey要幫手籌辦咪好大壓力？Audrey話無辦法啦，囡囡做審計工作，工時長唔得閒搞婚禮，好彩個女仲有個能幹嘅爸爸幫手。


佢仲話會計工作工時太長太拆磨年輕人，見到啲會計師朋友，都有叫佢哋諗下方法，減輕新入職會計師嘅工作量。