TVB剪片系統死機

【明報專訊】電視台新聞部向來分秒必爭，不過，觀眾噚日或者都發現，噚日無綫6點半新聞報道有唔少甩漏，好似頭條嘅前重慶市委書記薄熙來案報道同中午新聞嘅片段一樣，政務司長林鄭月娥講有關工廈劏房嘅故仔就無新片段，而一節新聞完結前預告下一節新聞重點亦消失，究竟點解咁多事？

新剪片系統用唔到

據了解，原來噚日下午大約5點鐘，電視台新聞部最重要一環嘅剪片工作竟然「死機」。無綫新聞部早前因應高清廣播，換咗一批剪片系統，近期不時出現小問題，但噚日嚴重到剪唔到片，為咗應急，只能用原始方法，包括人手操作後將片段放落光碟，再用光碟播放。由於工序太多，所以部分新聞趕唔切更新，唯有播返啲舊片頂檔。


Emily噚日嘗試搵無綫外事部總監曾醒明問吓，但就未能聯絡上。