綠色和平突襲 神華記招腰斬

【明報專訊】環保團體綠色和平早前試過喺中電（0002）記者會場外抗議，不過成效唔大，今次佢哋「學精咗」，潛入中國神華（1088）記者會，還扮記者發問，騎劫咗個記者會。


就內蒙項目抽地下水爭拗

綠色和平嘅成員話，神華喺內蒙古煤製油項目大量抽取地下水，破壞水資源。神華總裁凌文就反駁，話佢哋掌握嘅數據唔準確；凌文話，2007年以來地下水位平均只下降1.1米，並唔係綠色和平所講嘅100米。凌文又話，記者會開始前已接過佢哋嘅公開信，綠色和平亦承諾唔入場搞事，唔明點解講完唔算數。


管理層答完綠色和平嘅問題急急腳走咗，事後小琴問咗好多位公關，個個都話唔知道點解會畀佢哋入到場。不過，最慘嘅係一班財記朋友，晨咁早起身參加記者會，都係想同管理層了解多啲業務發展，點估到會因為有人踩場而腰斬。


email: piano@mingpao.com