歎千元早餐 省市招商團捱批

【明報專訊】一份早餐1000蚊，就算一個億萬身家嘅香港企業家睇完帳單之後，都感慨「唔係我畀錢，我都覺得好浪費」；但究竟邊個咁肯洗錢，請食貴價早餐呢？噚日《人民日報》批評內地省市政府來港招商，為擺門面一擲千金，奢侈程度令人唏噓。


人民日報：奢侈程度令人唏噓

內地政府來港舉行的招商活動，包括啟動儀式、簽約、大型宴會等環節，都會揀香港頂級酒店，如金鐘香格里拉、萬豪等。呢類酒店普通嘅標準房，每晚大概2000蚊。今年5月，某省招商團在香格里拉舉行早餐會，一名與會嘅香港企業家話，與會40人，合共消費4萬幾，人均約千元。有協助招商團組織活動嘅公關公司表示，通常出席招商活動的「名嘉賓」，坐一陣就走，通常宴會舉行到一半，人已經走咗一半，好多食物原封不動收走，非常浪費。


有好多香港企業家表示，唔會因為招商團選擇下榻3、4星酒店，就認為投資環境差，「政府招商，都係簡樸啲好」。