醫局掌櫃：預算案拉布險斷糧

【明報專訊】一直掌管醫管局「大水喉」嘅財務總監謝秀玲（Nancy）聽日就退休，佢噚日同Emily分享過去20幾年嘅「財政大臣」生涯，最難忘係早前財政預算案立法會拉布戰持續咗成個月，醫管局隨時「斷糧」無錢用，要四圍「撲水」，曾經同藥廠等機構講可能要賒數頂住先，又周圍搵銀行申請備用信貸，好彩最後預算案都通過咗，危機解除！

曾預告藥廠可能要賒數

Nancy話，醫管局嘅財政儲備有七成係用嚟出糧，而且醫管局有唔少中產同基層員工等住供樓，所以出糧係首要任務，佢仲提點接任人以後要預早同銀行溝通。Nancy咁多年嚟同過唔少醫生打交道，咁同7個聯網總監開會傾資源分配時有冇「火花」呢？Nancy個口好密唔肯講，話個個都好有風度喎。