極限運動靚相 星光大道展出

【明報專訊】Emily有好多同事係新聞攝影記者，而有啲攝影師就選擇拍攝極限及冒險運動。今日起至9月15號，尖沙嘴星光大道每晚8至11點有個大型展覽，展出50張早前參加「Red Bull Illume」攝影比賽嘅得獎作品，畀市民感受相中極限運動嘅熱情。


攝影師捕捉危險瞬間

有份參賽嘅葡萄牙女攝影師Romina Amato嚟到香港同大家分享拍攝心得。13歲已經立志做攝影師嘅佢，早喺讀書時期，老師已同佢講話攝影只係愛好，叫佢搵一份更似樣嘅職業，但佢無放棄過，仲當上「運動」攝影師。而今次作品就係拍攝運動員懸崖跳水，佢話拍攝過程相當艱辛，要坐喺船上拍攝，但好大浪，要有極佳集中力，又要顧住唔好整濕器材，最後佢從岩石之間搵到相中角度，捕捉到運動員「消失」於岩石前後嘅一瞬間。佢仲話，鍾意相片為讀者留下問號，你又估唔估到運動員由邊度出現？咁高跳落水又有冇事呢？