民協拍片諷筲箕論

【明報專訊】拍攝微電影似乎已經成為政黨必做宣傳之一，就連立法會「一人黨」民協近排都加入拍片行列，最近佢拍一段短片，宣傳特首普選拒篩選。Emily前幾日YouTube見到民協拍段《求愛大作戰之一路向篩》短片，片名雖然都稍覺重口味，但好可惜未見民協立法會議員馮檢基粉墨登場。

篩淨CY彭丹

呢套《一路向篩》，當然無套《一路向西》有模做主角，呢部題材係正經。片中，男女主角有日睇完中聯辦主任張曉明發表「筲箕論」後，領悟到優良品種總要篩，於是即刻返屋企搵晒珍藏偶像相片同CD出，諗住大批俊男美女之中篩出優良品種。就呢個時候，「阿爺」忽然現身，變出一個「中華牌」筲箕。呢個筲箕密到滴水不漏，連男主角見到都不禁問一句「窿咁細，真係篩到？」結果女主角用篩篩淨特首梁振英，而男主角就篩出甘肅省政協委員彭丹，然後嚇到跑入廁所作嘔咁誇張，仲話與其要阿爺個篩，不如自己揀咁話。

不過，Emily唔多明白，點解男主角篩淨彭丹後要作驚狀，唔通佢同工聯會榮譽會長鄭耀棠一樣，認為艷星唔適合做特首？民協，小心畀婦女團體鬧呀！