林鄭訪泰靠陳智思

【明報專訊】政務司長林鄭月娥下周三去泰國訪問考察，但港府喺當地人生路不熟，去到泰國點搞呢？原來，林鄭去泰國有「嚮導」幫手，Emily噚日撞見行會成員陳智思（Bernard），佢話下周會陪林鄭去泰國，陳家係泰國華僑，喺當地有人脈網絡，所以今趟行程Bernard都有幫手做啲聯繫。


陳係華僑幫手聯繫

今次返泰國，Emily講笑咁問Bernard，算唔算係接受「款待」？Bernard就苦笑話，「款待？自己要掏荷包㗎！」今次林鄭去泰國，唔係去接收飛機，而係去同當地高層官員會面，亦會參觀曼谷大眾運輸系統、當地一所醫院同聯合國教科文組織嘅曼谷辦事處等。


林鄭9月4日出發，9月6日返，呢段時間由民政事務局長曾德成署任政務司長。


聞「款待」陳苦笑

財爺曾俊華會喺9月3日（周二）去俄羅斯，以中華人民共和國代表團成員身分，喺聖彼得堡出席二十國集團領導人峰會，9月8日返港，其間由財經事務及庫務局長陳家強署任財政司長。