工聯公民黨同日開議辦

【明報專訊】今屆立法會議員上任差唔多一年，唔少地區辦事處陸續開幕，其中工聯會陳婉嫻、麥美娟喺青衣嘅議員辦事處噚日開幕，請得財爺曾俊華同立法會主席曾鈺成做嘉賓；而公民黨嘅「郭氏兄弟」郭家麒同郭榮鏗嘅聯合辦事處亦喺東涌開幕，請嚟幾乎逢請必到嘅食衛局長高永文做嘉賓。


財爺撐工聯場被潤

工聯會辦事處噚日開幕，各人致辭都要潤政府幾句，好似曾鈺成致辭時就話資源有限，議員唔可能有錢喺每一區都設辦事處，仲話財爺曾俊華亦唔會肯畀咁多資源班議員；嫻姐就話希望政府多聽意見。雖然財爺無回應，但佢喺烈日下同成班嘉賓睇舞獅睇得好開心，即使舞獅唔小心失手跌咗落地，亦無損大家雅興。


或者噚日比較趕急，一眾嘉賓面對3隻燒豬準備儀式時，只見無刀喺枱面，唔通要徒手切豬？後來菜刀送到，但切燒豬就只得嫻姐、麥美娟同工聯會會長林淑儀，3個女人就似乎唔多夠力，最終要由在旁嘅工聯會陳有海幫忙。


公民黨新西辦事處開幕，一個地區醫生議員，一個法律界背景，呢對「郭氏兄弟」雖然喺東涌基層屋邨設辦事處，但睇嚟佢哋打算利用佢哋嘅背景，為街坊提供醫學同法律專業服務。