城大嶺大家長也迎新

【明報專訊】又到新學年，Emily噚日喺網上見到城大電子工程學系上星期六搞咗個「家長簡介會」，Emily就此問過城大公關，佢哋回覆話家長簡介會搞咗成5至6年，以往畀Year 1新生嘅家長，家三三四學制，就係搞畀Year 2揀咗該系嘅學生嘅家長，有人帶埋子女一齊去，目的係畀家長了解吓子女大學生活、讀緊咩課程、乜嘢係GPA（大學計分方法），同參觀吓實驗室；仲話唔係想家長督促子女讀書，而係等佢哋畀啲鼓勵子女。


嶺大亦都喺上星期一搞咗個「家長迎新2013」，節目內容包括參觀宿舍、圖書館同茶敘，但Emily噚日聯絡唔到嶺大公關問個究竟。有網民話上到大學都要家長陪，好恐怖，亦有網民話「怪獸家長」、「直升機家長」入侵大學已經好幾年，仲聲稱話見過有家長陪子女去O Camp同去宿舍「屈蛇」！不過，Emily對此就無從考究。