佔中孖寶開學無減課節

【明報專訊】Emily噚日喺facebook見到唔少學生上載開學上堂嘅相，當中搵到佔中三子之一戴耀廷教授嘅教書身影，Emily向同學仔八卦一下，原來戴教授上堂時向學生介紹一個可以即時打回應嘅網站，可就教學提問或回應，仲叫同學仔即場試下，但講明唔可以打粗口。另一佔中之子陳健民教授今日都開學，佢話心情好沉重，皆因工作量大增。


戴耀廷介紹互動網 學生留言「支持你」

戴耀廷喺港大教法律，佢上堂時介紹咗個互動網站之後，有同學打「我哋支持你！」、「Benny好靚仔！」，更加有同學寫「戴教授做下屆特首」。Emily問佢今年開學壓力會唔會好大，因為要兼顧教學同佔中，佢就話今年無因為佔中而減少教書，都係教3科，有500幾600個學生，預咗今年好忙，所以都做多咗準備工夫，備課方面無咩問題。佢話噚日無學生搵佢講佔中，自己都無喺堂上講。


喺中大教社會學嘅陳健民就覺得咁快開學好沉重，皆因除咗教書仲要處理佔中嘅事。佢都話今年無減少教嘅學科，都係要教180幾個學生，佢仲叫學生諗都唔好諗今年會少啲功課！Emily問今年會唔會多咗學生想修讀佢教嘅科目，陳教授就話今年張waiting list都幾長，但唔清楚係咪因為佔中嘅關係。