純官會記者 十問九迴避

【明報專訊】身兼新世界（0017）主席的鄭家純（純官），噚日響周大福（1929）嘅股東會後見記者。當時係朝早11點，純官唔知係咪周公上身，答親問題都帶大家夢遊花園，令晨早專程過嚟捧場嘅一大班記者，最後都要得個桔番去。


純官友善地接受咗4分鐘訪問，如扣除有一半時間係記者發問（記者加埋應該問咗將近10條問題），即係佢每條平均答咗10秒。點解純官可以答得咁快？因為無論問純官點睇新世界酒店分拆、點睇樓市成交、周大福生意如何，佢一句「今日呢個場合唔方便答」，或者「遲啲就出季度數據，依家唔方便答」，就簡單直接答完個問題。


正當記者以為個訪問要就咁完結、冇「功課交」時，純官最後幾「識做」，講咗少少嘢比大家返去交差。有人問佢搶金潮過後周大福賣金係咪少咗，純官話近排金價回穩，冇咁多消費者搶金，賣金佔周大福嘅銷售比例見到有少少回落。


email: piano@mingpao.com