楊元慶派2500萬畀員工

【明報專訊】呢幾年經濟唔好，成日都聽到有公司裁員減薪。不過，近期熱炒嘅IT界，就完全係另一個世界。全球最大個人電腦（PC）生產商聯想（0992）行政總裁楊元慶，就決定將攞到嘅325萬美元（約2520萬港元）獎金，全部都分畀全公司1萬個基層員工。


我哋成日聽人話，員工係公司最重要嘅資產，但有幾多公司老闆肯對員工咁好？楊元慶果然係非一般老闆，今次已經係連續第二年將獎金分出嚟，每個員工平均分到大約325美元（約2520港元）。


聯想登上PC一哥寶座，老闆都特別慷慨。楊元慶仲話，聯想要做中國智能手機一哥，他日夢想成真，唔知又會派幾多獎金呢？不過，楊元慶去年收入其實唔少，唔計分出嚟嘅325萬美元，佢仲收緊1100萬美元（約8530萬港元）年薪；佢持有嘅7.44億股聯想股份，家市值亦達56億港元。兩千五百萬港紙？濕濕碎啦。