郭醫生拍片勸勿信「神油」

【明報專訊】行房快過保特（牙買加短跑選手），搵「神油」有無幫助？本身係泌尿科專科醫生嘅公民黨立法會議員郭家麒，就睇準唔少人對醫學存有疑問，所以搵埋黨友一齊拍短片，話要解開醫學謬誤，首集就係拆解「神油」效用。Emily噚日問郭醫生，搵佢睇症嘅病人有無用過「神油」，郭醫生一臉自信咁話，「如果佢哋得，就唔使搵我」。


拍一系列「健康小百科」短片

郭醫生話，佢哋拍一個系列「健康生活小百科」短片，打頭炮嘅係「神油故事」，話說男主角因為自己「快過保特」，激嬲女朋友，喺廁所同友人訴苦，點知廁格忽然彈出高人，拎住「神油」獻計。就喺呢個時候，同一廁格再傳出郭醫生一句「哈哈哈！『神油』無用㗎！」。


郭醫生話，「神油」雖聲稱對夢遺早泄有效，但「神油」成分是蟾酥（來自蟾蜍分泌物的一種中藥），按理解應該係想透過麻痹作用延遲射精，達到解決早泄功效。但佢翻查資料發現，蟾蜍只有解毒、止痛等功效，無話可以醫早泄喎。


提醒過量使用或致心臟病

學理分析總不及臨牀實驗，郭醫生話，佢最近買咗支「神油」嚟試，至於感覺如何，郭醫生話只係用嚟搽手指頭！佢話，唔知係咪心理作用，噴咗幾下都只覺得有少少麻痹，無乜特別。不過，佢提醒大家，「神油」應內含麻醉藥成分，過量使用，輕則頭暈作嘔，嚴重者會抽筋或引發心臟病。


坊間有好多唔同種類嘅「強身」產品及藥油，郭醫生並無點名道姓指邊隻牌子產品。Emily噚日就想向生產「印度神油」嘅華仁行化工廠問意見，但就暫未聯絡上。