全球受歡迎城市 港排第8

【明報專訊】香港向來被譽為好客之都，國際間又點睇呢？法國市場調查機構Ipsos今年2月訪問來自24國嘅1.8萬人，揀咗全球48個城市，就「做生意、居住、旅遊」三大範疇評分，從而得出「全球最受歡迎城市」排名，噚日有結果﹕最受歡迎十大城市，香港排第8，成為榜上兩個亞洲城市之一，另一個係東京，排第7；單喺「做生意」呢一欄，香港排全球第4。


紐約奪冠 倫敦巴黎雙亞軍

全球最受歡迎城市，由美國紐約脫穎而出排第一，英國倫敦同法國巴黎則緊隨其後並列雙亞軍，近年有意打造成文化樞紐嘅阿聯酋阿布扎比，就幾令人意外咁高踞第4，凌駕之後嘅澳洲悉尼、瑞士蘇黎世等。


知道咗最受歡迎城市，自然想知邊度係最唔受歡迎，結果「榮膺」全球最不受歡迎城市「三甲」嘅分別係巴基斯坦卡拉奇、伊朗德黑蘭，以色列特拉維夫同波蘭華沙就並列「雙季軍」。