馬時亨：勿亂講分道揚鑣

【明報專訊】商務及經濟發展局前局長馬時亨（肥馬）噚日去民主黨主席劉慧卿嘅網台節目做嘉賓，肥馬同大家分享為官之道嘅時候，提醒官員應該小心自己嘅言行，唔好講出會形成唔好印象嘅說話。佢之後講笑咁話，自己上卿姐嘅節目都唔可以拋錯成語，更加唔可以講「卿姐，拜拜啦，分道揚鑣啦！」唔知佢係有心定無意去窒教育局局長吳克儉呢？


籲官員小心言行有錯道歉

肥馬鼓勵官員，若果做錯事或者覺得自己畀市民唔好觀感時，可以道歉，因為佢覺得「官員道吓歉，畀市民消消氣，唔係壞事」。佢仲話，自己當年（2002年「仙股風波」）都係走出嚟鞠躬。


講番當年鞠躬事件，肥馬話要為自己平反，話說當年只係安排電子傳媒去影佢，搞到成班報紙行家差啲追住佢嚟打，但佢最終都無應報紙行家要求鞠多一次躬。肥馬噚日講番呢件事，話當時自己係講過要叫所有傳媒嚟採訪，但有位同事就話，淨係叫電子傳媒就得啦，肥馬就信咗呢位喺政府經驗比佢多嘅同事，點知就係信錯咗人！