耿春亞：踎係內地文化 香港人要尊重

【明報專訊】《環球時報》評論話如果內地人唔嚟香港消費，唔知香港會變成點。香港內地畢業生聯合會主席耿春亞噚日接受港台訪問，話自己某程度上同意自由行數量太多，但呢樣嘢唔應該同文化、情感混為一談，仲舉例說明內地人鍾情踎地，香港人多數覺得核突，查實係文化差異，又話香港人都唔會怪禮拜日外傭「佔領中環」，係因為了解咗佢哋嘅文化喎﹗


耿春亞話，內地客周街踎，其實有文化同地理原因，因為內地北方多數有大風沙，當地人習慣踎喺度食嘢避沙塵，結果習以為常。立法會議員范國威打入電台同耿春亞對談，佢都同意應該包容唔同文化，但覺得內地客應該尊重本港規矩，旅發局都可以考慮印小冊子，教自由行禮儀咁話。


旅界叫范國威勿倒米

不過，范國威同環保觸覺譚凱邦前日話如果自由行減少，香港人會開心到開香檳，就辣㷫咗旅遊界。香港旅遊聯業工會聯會噚日發聲明，鬧爆范、譚言論不負責任，話家香港旅業側重內地客，叫佢哋唔好倒米。