摩笛5行字 舞低南車5%

【明報專訊】尊稱「大摩」嘅摩根士丹利每有出位報告發布，都被形容為吹「摩笛」，意指魔笛一響，投資者皆聞笛起舞。噚日，大摩再次發揮魔笛威力，喺一份策略報告中，預言基金愛股南車時代電氣（3898）2個月內股價必跌，南車果然應聲下跌5%。


其實，相比早前恒指2015年底50,000點嘅最牛預測、騰訊507.8蚊嘅目標價，今次魔笛真係唔算出位。勁就勁係今次大摩叫沽南車嘅理據其實得短短5行字：佢話60天內股價必跌係因為近期股價不斷炒高，現時估值較中國同行高20%，較全球同行高50%，令到股價已經冇乜吸引力；而業績就大有可能遜預期，因為內地高鐵擴張慢過預期，令到公司增長亦都難達市場預期，同時間高端產品又面臨減價壓力，所以重申沽售！


小琴睇，報告字數唔多反而顯得字字鏗鏘，但呢條橋並非人人可以學，除非出身尊貴大行，否則好易被人話扮cool。