北京鴨豐唇靚番

【明報專訊】整容嘅風氣已經由人類界傳到動物界喇！上個禮拜被人笑似雞多過似鴨嘅北京大黃鴨，經過前日連夜「整容」豐唇，執番靚個嘴仔，尖嘴終於變番寬嘴。


網民：扮雞因怕全聚德

話說前幾日，有眉精眼企嘅北京市民發現隻北京鴨個嘴變得好尖同皮膚有皺紋，望落去有啲「委屈」咁，有網民仲話可能係「為咗唔畀全聚德（著名烤鴨店）捉走，所以扮成一隻雞」。


北京國際設計周組委會前日出嚟解畫，因為天氣影響令到充氣不足，同製作工藝有瑕疵等原因，搞到隻鴨望落去唔太精神。不過，佢哋已經喺上個禮拜五晚幫鴨仔做手術，將佢個嘴嘅200幾塊材料重新拼裁，令佢重拾應有風采。所以家嘅鴨仔可以話係脫胎換骨。


水位降 鴨仔走光

雖然鴨仔靚仔番，不過就因為永定河水位下降而「走光」，露出咗部分底座。北京國際設計周組委會展覽總監李洋洋就話，家正根據情况，配合水域實際情况調整配重。但園博湖係水面，觀眾睇黃鴨時要俯視，所以視覺上，隻大黃鴨好似唔夠高咁，等到9月26日，大黃鴨搬去頤和園昆明湖之後，遊客就可以平視佢啦。