CY老婆要令禮賓府零廚餘

【明報專訊】曾好有心成立公司幫手推動減廚餘嘅特首夫人梁唐青儀，未有為成立公司起爭議嘅事而退縮，噚日出席綠色力量嘅活動，同大家分享中秋節減少廚餘嘅貼士。佢提議大家可以喺煮食時物盡其用，如用食剩嘅月餅餡料整湯圓，至於今年中秋節食啲咩？梁太話仲未有時間諗中秋食乜餸，但都會係家常便飯。


教中秋惜食貼士

除咗用月餅餡整湯圓外，梁太仲話，大家中秋節都會食水果，不妨試吓用食剩嘅橙皮做甜品，先將橙皮浸水去澀味，再加啲朱古力，就會變得好好味。梁太話五星級酒店都有賣呢種甜品。另外，佢提議大家食完柚子，可以整蝦子柚皮，實行物盡其用。梁太話自己一家基本上都係零廚餘，但家搬去禮賓府住，就努力推動整個禮賓府零廚餘。