泛民去CY飯局撐陳健民

【明報專訊】特首梁振英（CY）聽晚會展開新一輪政改晚宴，邀請咗佔中發起人陳健民教授及反佔中嘅「幫港出聲」鄭赤琰教授。兩大教授對陣，如此盛會，本來對晚宴興趣一般嘅中大政治與行政學系副教授馬嶽及民主黨李永達等人，最終都答允出席。佢哋話，擔心飯局上陳健民會畀人圍插，所以一齊去挺陳教授咁話，真係要讚佢哋有義氣！


阿達8月時曾獲邀出席飯局，但佢最終無出席。馬嶽上次都以「唔喺香港」為由無去晚宴，佢話其實對以飯局形式討論政改興趣不大。不過阿達同Emily講，之前同陳教授傾過，陳教授希望多啲民主派嘅代表可以一齊出席講吓意見。阿達認為，多啲人去，火力都多啲，咁樣大家討論上嚟，佔中都唔會處於下風。同樣獲邀嘅民主黨副主席羅健熙就話，預咗「買定花生」去睇戲，睇陳教授同鄭教授對陣有無火花。


溫和派亦獲邀

其實，泛民又唔使咁驚，皆因20幾名獲邀者中，仲有公民黨嘅楊岳橋，亦有立場比較溫和嘅香港當代文化中心總監黃英琦、港大法律學院院長陳文敏，同埋前公務員事務局長王永平等。


今次係特首繼8月初之後第二輪晚宴， 除咗聽晚，17號仲有另一場。