「癲馬女郎」添馬公園現身

【明報專訊】噚日一眾打扮性感嘅女士喺金鐘添馬公園影相，搞乜呢？原來佢哋係法國國寶「巴黎癲馬」，將於今日至21號喺香港演藝學院歌劇院首度公演劇目《永恆的癲馬》。據聞，佢哋每逢到外地表演，都會揀選當地一個地標影相，今次佢哋揀咗政府總部外嘅添馬公園。Emily問公關，影相前有無同政府打招呼呢？對方就話唔多清楚。


「巴黎癲馬」首次來港表演，呢個女性舞蹈團隊有62年歷史，唔少人去巴黎時都會捧場。當年佢哋好前衛，以性感裝扮表演歌舞，因而跳出名堂。


夠18歲先畀買飛睇

今次嘅表演已開始賣飛，但記住18歲或以上人士先至可以入場觀看㗎。今次劇目《永恆的癲馬》，包括：God Save Our Bareskin ，由法國編舞家Philippe Decoufle重新編排。詳情可以查閱 www.uepl.com.hk/shows2D.php。