CY政改飯局 林鄭罕現身

【明報專訊】特首梁振英今晚喺禮賓府請食飯傾政改，唔計官員，應邀出席有28人咁多，雖然各方政見人士都有，但名單中泛民與建制派對陣嘅意味都頗濃；晚宴仲有一名「稀客」，就係好打得嘅政務司長林鄭月娥。以往，政改由政務司長主理，但日前有報道話林太會做政改嘅「不沾鍋」，避免受政改爭議拖累咁話，但佢今晚現身飯局，唔知係咪想借此表明佢同CY仍喺同一條船，唔會知難而避？


飯局客人當中，佔中發起人之一陳健民及反佔中嘅鄭赤琰教授固然係焦點，與會亦有唔少重量級人士，如兩大商會嘅領導。政界除咗民主黨及民建聯代表，更有傳統建制派社團九龍社團聯會代表。論法律觀點有陳文敏，亦有胡漢清，加上經常喺《文匯報》、《大公報》撰文嘅宋小莊。不過Emily擔心，咁嘅人腳坐埋會變成《城市論壇》，你發一言我搶一句。還幸，同場有正牌《城市論壇》主持人謝志峰，如CY搞唔掂場面，可以搵佢幫吓手。


唔畀引述唔透明 記協拒應邀

CY今個月兩場飯局，都食咗一啲檸檬，繼學民思潮一早話唔會應邀出席17日嘅飯局，記者協會亦話已拒絕出席今晚晚宴。記協指飯局透明度低，因為特首辦講明與會者不得引述其他人士包括CY嘅言論。特首辦話，咁嘅安排係為咗畀出席者暢所欲言，因此提出「自我表述，互不引述」嘅原則咁話。