CY落區 長毛轉戰場內

【明報專訊】特首梁振英（CY）嚟緊嘅星期日將會出席第三場公眾論壇，地點係灣仔愛群道5號嘅鄧肇堅維多利亞官立中學，到時運輸及房屋局長張炳良同勞工及福利局長張建宗齊齊陪CY出席。警務處長曾偉雄噚日就話，暫時收到兩個分別支持同反對嘅團體申請集會，一哥希望團體能遵守同警方之間嘅協議，以免混亂。


fb蒐意見吳文遠分析策略

上次發起「默站」嘅社民連副主席吳文遠，早前透露喺facebook收集大家對周日行動嘅意見，佢仲好有策略咁分析，今次地點好處係路闊車少，缺點係正門後門相距100米，容易逃避示威者，講咗咁多，結果佢決定今次嘅戰場唔係場外，而係場內，吳文遠仲透露會同社民連主席梁國雄（長毛）等人，喺前一晚通宵排隊攞入場門票，爭取喺場內示威。


忙中秋活動 公民黨未必「大搞」

至於公民黨，據聞佢哋仲諗緊周日有乜行動，但因為臨近中秋，擔心地區有唔少活動要出席，未必能大搞。