陳永棋幫手搵地

【明報專訊】工商界噚日舉行慶祝國慶成立64周年籌備委員會酒會，中華總商會會長楊釗被問中總政改方案傾成點，佢話家只係諮詢階段，Emily問泛民提出嘅公民提名有無得傾？楊釗就意有所指咁話，中秋節同阿爺做節，大家唔鍾意可以唔去，但唔能夠「搞彎」成餐飯，言下之意，唔通講緊佔領中環？楊釗無正面回應，只係話香港要依法辦事，唔能夠輸打贏要喎。


中總未商議好政改

Emily又撞到全國政協常委陳永棋，棋哥仲好有心幫特首梁振英搵地，就連去搭車去機場都會留意有無地可以起樓。棋哥話，佢每次去機場都發現有好多土地無發展，建議政府可以搵一小部分郊野公園土地建廉價屋，令後生仔可以買樓上車，增加佢哋對香港嘅歸屬感！至於應撥出幾多郊野公園土地？棋哥話佢唔係專家，只係分享一下佢搭車去機場嘅所見所感啫。


講起去機場，棋哥星期一就會同友好協進會一齊上北京3日，將會見全國政協主席俞正聲、港澳辦主任王光亞，同統戰部長令計劃，而中華出入口商會會長莊成鑫就同Emily講，佢哋10月下旬都會上京。