社署新署長愛與仔女舌戰

【明報專訊】新任社會福利署長葉文娟7月初到位後，噚日終於有時間同傳媒茶敘，笑住話社福議題係今屆政府工作重點，所以上任兩個月已經「唞唔到氣」。不過佢話接任署長後，每個範疇都想做好，尤其上周一推出嘅「長者社區照顧服務券」，係佢做勞福局副秘書長（前衞生福利及食物局）年代已有嘅「錢跟人走」概念，至今320人申請，相信可達到兩年1200個嘅目標。


忙到「唞唔到氣」

既然社福項目屬於重點工作，葉文娟都好明白前線員工壓力，不單落區同各分處同事見面，稍後仲會約見工會繼續爭取增加人手。至於有社署專員早前話熱心人派物資，可能助長露宿者嘅說法，佢強調社署向來支持市民熱心助人，自己亦被熱心人嘅行為感動，但最重要靠官、商、民通力合作，各界亦要多啲發放正能量。


被問到唔少前社署署長，好似林鄭月娥、鄧國威等都成為司長局長，葉文娟就話自己只想「有一分熱發一分光」，做好自己崗位，又話「我個樣都唔似有野心啦」。屋企有兩子一女嘅葉文娟，仲話自己好鍾意享受家庭樂，最近睇完電影《狂舞派》，平時又會同仔女就社會議題激辯，但係乜議題就不便透露。