議員萬聖節無緣免費撞鬼

【明報專訊】中秋將至，眨吓眼下月又到萬聖節，今年海洋公園一如以往，邀請傳媒、立法會議員等試玩公園嘅「哈囉喂全日祭2013」，不過Emily就聽聞，今年迪士尼就無請議員試玩「迪士尼樂園黑色世界」，唔通畀國泰款待立法會議員被指利益衝突事件嚇怕咗？

Emily問咗迪士尼，佢哋話舊年有招待立法會議員，但唔係年年有咁嘅安排；至於海洋公園就話年年都請議員同傳媒試玩，目的係想聽大家意見，唔覺得有咩問題。現時海洋公園門票要320元，迪士尼一日標準門票就要450元。議員謝偉俊同Emily講，自從款待事件後，團體有時送飛畀佢都唔知要唔要申報，有時索性婉拒喇。


「公職人員誠信關注組」成立

可能議員行為令人關注，噚日有幾個「熱心巿民」喺酒樓公布成立咗一個「公職人員誠信關注組」，要監察政府及公職人員誠信，未來可能有集會，仲整好一個似模似樣嘅網頁，內有連結至梁粉園地嘅「港人講地」網頁，以及特首、財爺同發展局嘅網誌