田少派潔廁劑迎中秋

【明報專訊】每逢佳節，唔少議員都會向街坊送上「蛇齋餅糉」，中秋節議員就忙住派月餅喇，但點樣可以特別啲呢，唔少議員都別出心裁，好似喺新界東出選嘅田北俊（田少），近日就喺地區向長者派禮物包，除咗有煤氣公司贊助嘅月餅，仲有一包洗衣粉同埋一樽潔廁劑，唔講清楚係中秋禮品包，仲以為係年尾叫人去大掃除！

樹根唔介意人話「蛇齋餅糉」

同一選區嘅人民力量陳志全，就花多啲心思，噚日喺地區派發自製月餅。至於港島區嘅民建聯鍾樹根，除咗有煤氣公司贊助嘅月餅，仲送1公斤白米畀區內長者。樹根話完全唔介意人哋話佢「蛇齋餅糉」，話過時過節，好多長者特別係獨居者情緒容易有問題，所以都係借呢啲機會向佢哋送上關心，唔使佢哋成日一個人坐喺屋企，所以一年都搞一兩次呢類活動。


不過，講到派禮物，以上幾個議員拍馬都追唔上一啲區議員，區議員可能選區細，選民較少，所以可以重手一啲，有新界東長者就畀Emily睇過佢收到嘅禮物包，內有一個本地名牌月餅、一盒比利時名牌朱古力餅、幾包梳打餅，仲有一大包米粉，Emily計過數，呢份禮品包貨值應該超過200元！