陳茂波酒會粒聲唔出

【明報專訊】潮屬各界噚日搞國慶酒會，政務司長林鄭月娥、財政司長曾俊華、律政司長袁國強都有出席，身為潮州人嘅食物及衛生局長高永文同發展局長陳茂波當然不能少。Emily近期見茂波寫blog就多真人較少見，當然要問吓佢點解引錯郊野公園面積數據、郊野公園起樓係咪思想生癌等，但佢可能勤於寫blog，對一眾傳媒封嘴。


林鄭助開路

茂波出現成為傳媒追訪對象，Emily同行家跟住茂波走，追問佢近5分鐘，但佢全程封口一句都無答，仲要「奶媽」林鄭月娥幫手解困，由林太開路。


高永文高唱國歌

呢頭茂波離開時畀記者圍到甩頭甩髻，同樣嚟自潮州嘅高永文喺場內都畀人圍，但就係畀fans圍住影相。


國慶少不了唱國歌環節，唔少人只係作狀唱幾句，高局長就表現激情，張開口大聲高唱，Emily問佢做咩咁肉緊，佢就話「唱國歌，梗係要投入啦！」