卿姐再去聯國告狀

【明報專訊】聯合國兒童權利委員會將於9月26日喺日內瓦舉行研訊，審議中國（包括香港）有關履行《兒童權利公約》嘅報告，民主黨主席劉慧卿毋懼去年喺此地被搶手袋嘅陰霾，屆時會同本港一啲非政府組織成員去瑞士做觀察員，旁聽聆訊。


卿姐話去年9月被搶手袋後，都已經去過當地一次，况且今次好多人一齊去，無有怕。呢個聆訊係審議中國包括香港嘅兒童權利狀况，港府亦會派官方代表團去會議答辯。


要求關注港貧童

卿姐話佢哋雖然唔可以喺正式會議中發言，但會爭取機會跟委員非正式會晤，要向委員會「告狀」。佢話委員會主席早前訪港時都有同佢會面，佢當時提出要求喺聆訊關注一下香港貧窮兒童狀况。佢話民間團體統計，香港有28.2萬名18歲以下人士生活喺貧窮線下（即入息中位數以下），希望委員會施壓，等港府可以做啲工作改善狀况。