特首演講高永文閉目養神

【明報專訊】專業及資深行政人員協會噚晚7周年誌慶，Emily都有捧場。特首梁振英（CY）演說15分鐘，話高官過去兩三個月境外四處奔波，為港人拓展商機。睇CY今次形容得幾貼切，因為佢演講期間，嘉賓之一食物及衛生局長高永文閉目養神，好似好。

盧偉國吹色士風籌款

而幫過CY助選亞視前主播洪綺敏噚晚再作馮婦做司儀，好風騷咁滿場飛。除高永文，律政司長袁國強都有出席，大律師公會會長石永泰仲同佢咬耳仔密密斟！不過，石大狀就故作神秘，唔肯同Emily講同司長有咩傾，只係話大律師公會唔係智庫，無資源去研究自己政改方案，只有政府提方案時畀法律意見。

另外，立法會工程界議員盧偉國就吹色士風獻技，同人jam番幾首歌幫協會籌款。