海天堂老闆日日食龜苓膏

【明報專訊】近排香港人聞龜色變，皆因老字號海天堂畀人質疑賣發霉龜苓膏，又有學者話驗到啲龜苓膏得芝麻咁少龜板成分。Emily噚日同海天堂老闆吳耀明一聚，發現佢精神唔錯，吳老闆話自己同屋企人成日食自家龜苓膏，佢更加係日日食、唔食唔得咁話。


查實吳耀明成日拍廣告做人辦推銷自家龜苓膏，先至咁廣為香港人熟悉，不過佢噚日話暫時唔會諗計做宣傳住，因為要專心配合警方同海關調查。Emily就覺得，即使吳老闆做咗咁多年生招牌，但一日未搞清楚龜苓膏成分用料，市民都係比較難放心食用嘅。


至於海天堂今次面對咁大風波，到底拆唔拆得掂？星期一啱啱過咗61歲生日嘅吳老闆就話，唔知係咪60歲後轉運，命中注定要遇上呢一劫，但佢點都會撐落去，答謝員工同熟客支持。