Cool魔拍片 促重視僱員家庭樂

【明報專訊】無綫電視劇呢期成為話題，民政事務局就捉到《衝上雲霄II》嘅Cool魔張智霖（左）擔任「家庭友善僱主獎勵計劃」大使，伙拍家庭議會主席石丹理（右），喺宣傳短片中呼籲公司同市民參與獎勵計劃，叫僱主提供多啲家庭友善措施，等僱員可以工作與家庭兼顧。


而政制及內地事務局都唔執輸，拍咗段講兒童權利嘅，請到電視劇《情逆三世緣》主角關詠荷聲音演出，幫手講解兒童權利。有份搞呢段片嘅人員同Emily講，關詠荷返屋企練對白時，囡囡聽到都好奇，問媽咪自己有乜嘢權利！政制局做咁多嘢，都係因為副局長劉江華月底要去瑞士日內瓦出席聯合國兒童權利委員會研訊，屆時佢實會被委員質問香港實施公約情况，所以政府都要做啲宣傳，先夠料同人解釋。