教局招標搞內地交流 畀6.6萬學生參加

【明報專訊】Emily噚日上去學民思潮個facebook專頁望兩眼，咁啱見到班網民好熱烈咁討論緊教育局招標，搞初中同高小學生嘅內地交流團，今次教育局算醒水㗎喇，個名唔再用「愛國」、「紅色之旅」呢啲「敏感詞」，而係「同根同心」。但係就算個名點改，都逃唔過網民嘅注視。


今次呢個交流團項目都唔嘢小，根據教育局招標書，入面講到明投標者要喺2014至2016嘅兩年間，安排唔多過6.6萬個小朋友去內地交流。Emily見到呢個數字都呆咗，唔怪得之唔夠一日，呢個消息就有成百幾個人轉發，有網民留言話教育局「死心不息」，仲話要繼續包圍政總喎。


有一個網民分享話自己去過呢啲交流團，導遊帶佢哋去湖南睇毛澤東故居，個同學話佢去嗰陣時覺得無乜嘢，但家諗番覺得有啲恐怖，覺得係潛移默化式洗腦。不過，亦有人覺得，可以平價北上交流，就當去旅遊啦。