黃錦星月下約會大嘥鬼

【明報專訊】噚晚中秋節，最開心莫過於一家人一齊食飯賞月，環境局長黃錦星就趁前晚迎月到維園綵燈晚會，呼籲市民唔好浪費食物、製造廚餘，仲帶埋被指激似佢嘅「大嘥鬼」落區，所以好受歡迎，唔少人爭住同佢哋合照。原來眼闊肚窄嘅「大嘥鬼」最受小朋友歡迎，有人仲即場大展歌喉，唱晒成隻《惜食香港》廣告rap歌，證明環境局嘅宣傳策略深入民心，港人連歌詞都背埋。


呼籲節日唔好嘥嘢

局長形象環保，又點會係大嘥鬼呢，黃錦星話減少廚餘唔難，例如食團圓飯前預算分量，按量點菜，就可以避免製造廚餘；唔好買過量月餅，真係食唔晒嘅，可以捐畀食物回收機構。而為咗方便市民，環保署整咗張接受捐贈月餅名單，包括聖雅各福群會同東華三院等，詳情可以瀏覽環保署網頁。