議員中秋出動 陳志全街坊裝

【明報專訊】大時大節，「蛇齋餅糉」又係時候出動。噚日中秋節，好多立法會議員都同街坊過節，除咗派月餅，人民力量嘅立法會議員陳志全（慢必）噚日就同一班將軍澳街坊整花燈應節。慢必嘅助手同Emily講，佢哋請咗一個識整花燈嘅義工教大家整蓮花花燈，吸引唔少小朋友一齊去玩。大家拎住自家製作嘅紮作花燈都幾開心。


另一邊廂，自由黨黨魁田北俊同黨友易志明，都趁中秋節繼續開檔派月餅，佢仲喺facebook度話多謝煤氣公司贊助月餅。事實上，煤氣公司係最大嘅「月餅贊助商」，捐咗好多月餅畀唔同議員喺地區派發。


大家都忙住派餅之際，比較輕鬆嘅莫過於新民黨主席葉劉淑儀，佢正同阿女歐遊「團圓」，但不忘喺facebook同大家講聲「祝所有朋友家庭美滿，花好月圓，中秋節快樂」。