李慧詩鬥贏沙灘車

【明報專訊】政府前排就搵世界單車錦標賽冠軍兼奧運銅牌得主李慧詩拍咗一段短片宣傳香港，仲喺李慧詩主場烏溪沙單車練習場搭台，搞咗一場沙灘車鬥單車比賽。李慧詩「賽後」話，同沙灘車「比賽」唔算辛苦，都係好似平時自己玩技術咁啫。


政府「香港品牌」前排搵咗「見面•見香港」拍攝短片宣傳香港。為咗營造壓迫感緊張效果，攝製隊出動大型電動沙灘車同李慧詩展開追逐戰，在高速下拍攝女車神，但要超越李慧詩唔係咁容易，相反，李慧詩就從容不迫話唔算辛苦，「比賽」期間仲可以喺度諗，鏡頭點先可以拍靚啲，拍完每一場都會同導演交流。牛下女車神除咗擔心自己片中拎住獎牌太輕佻，仲連頭髮要紮幾高、頭盔要戴幾高都要講究。


「香港真的很好」

話說短片其中一場喺海灘拍攝，攝製隊要潮漲前完成，搞到李慧詩都話氣氛緊張。拍攝期間李媽媽伴隨左右，為女兒打點一切，更同愛女用手機玩「自拍」，而李慧詩總係笑容滿面。


幫手拍宣傳片，都要幫手講吓香港嘅好話，佢話香港97回歸以來經歷好多變遷，但港人都可以克服到，「每次到不同國家，都會回想，香港真的很好……每一次離開，都更想回到香港，就算以後不再做運動員，也想在香港定居」。