打工仔呻：天兔不似預期

【明報專訊】「怪獸颱風」天兔上周搞到全城如臨大敵，仲有好多市民期待噚日唔使返工，點知天文台9點幾轉發3號波、10點幾除下所有風球，好多打工仔同學生哥好失望。有網民即刻改咗陳奕迅為《衝上雲霄》唱嘅主題曲《歲月如歌》，歌詞話「天兔不似如期，但要走，得半day」，仲話個風「已dur皮」，搞到佢哋「焗住返工送車尾，起身無力撐起」，擺明「整鬼你」！


首詞喺facebook同WhatsApp瘋傳，相信唔少人都有共鳴。隻歌係改得幾好，但Emily成朝都去咗採訪風暴消息，打唔打風都係要開工，所以無乜所謂。


李氏力場上Wiki

雖然噚日要返工，但有網民真係好得閒，幫「李氏力場」開咗個Wikipedia page，或稱「熱帶氣旋屏蔽系統」！仲有人做統計過，話2006年起香港打咗13個8號波，得3次可以全日停工，其餘多數要返半日工；又因為暑假，真正因打風停課嘅只得4次，停課又停工嘅只得1日。不過Emily覺得，有時停課只係幼稚園同小學停，中學無停，上午班停時下午班又要返，就咁講「停課」似乎太籠統。


輸賭網民「找數真漢子」

仲有個好衝動嘅網民同人輸賭，話如果噚日早上8點後仲打緊8號風球，佢就咬住個橙去旺角行人專用區扮羅志祥跳舞。點知佢言出必行「無走數」，仲拍埋片擺上網，好多人都讚佢「找數真漢子」。