公院防非港人偷雞

【明報專訊】以往香港人去公立醫院睇症，攞張身分證出嚟，就可以用港人價找數，於是唔少過期居留嘅「非香港居民」就用過期身分證「偷雞」享用公共資源，醫管局估計每年就因為咁收少咗成2000萬元。食物及衛生局噚日公布，由呢個星期六（28日）開始，市民去公立醫院同診所，出示身分證後要再經新嘅聯機系統核實香港居民身分，先可以用港人價睇症。


新系統周六開始

食衛局發言人話，非香港人用過期身分證喺公院睇症，享用公營醫療服務資助，令政府損失收入，所以推出新系統杜絕呢種行為。以普通病房每日住院費為例，家「非符合資格人士」收費係4680元，急症室收費係990元，但係香港人兩者收費都只係需要100元。


致每年損失2000萬

到底呢種行為令公立醫院損失幾多錢？醫管局話過往無辦法統計，但根據同入境處喺2009同2010年聯手做為期4星期嘅調查，使用公立醫院服務嘅香港身分證持有人中，約0.05%嘅逗留期限已屆滿。醫管局就咁推算，估計每年喺相關醫療費用損失約2000萬元。