忙佔中先「懺悔」戴耀廷對唔住耶穌太太

【明報專訊】佔領中環仍處於商討階段，佔中三子之一戴耀廷教授就已經要「自首」認衰。戴教授話，熱切期待未來兩個月舉行嘅商討日，但都擔心會忙到無時間返屋企同喺星期日去教堂參加崇拜，所以噚日佢主動話「老婆，我返唔到屋企食飯」、「主耶穌，我返唔到崇拜」。


三子心聲 感觸又感動

噚日佔中三子同20多個團體代表開記者會，介紹未來兩個月嘅商討日活動。除咗戴教授向老婆及神認罪，另外兩個召集人朱耀明牧師同陳健民教授都同傳媒分享心底話。朱牧師話好感動，因為見到有咁多團體參與D-Day 2。


陳教授就話自己做人無戴教授咁樂觀，3月時有人同佢講佔中拖咁耐，個活動死梗。不過，家見到愈來愈多人參與商討日，所以好感觸。


吳文遠樂見一齊被人拉

另一方面，漫畫家尊子噚日代表「漫畫刁民」出席記招，被問到點解參加佔中，佢笑住話係因為相信鄧小平嘅話「實踐是檢驗真理的唯一標準」，所以都想睇吓係咪真係會有動亂。社民連副主席吳文遠就話，高興見到更多人陪佢哋一齊被人拉同被人告。