政府搞比賽 龍津石橋徵活化妙計

【明報專訊】老一輩香港人相信唔會忘記九龍城寨呢個龍蛇混雜之地，土木工程拓展署噚日就宣布，將2008年「出土」、早於1873年清朝時已起好嘅龍津石橋遺蹟，透過舉辦公眾概念設計比賽集思廣益，將呢段長200米、闊30米嘅石橋翻新成保育長廊，從而連接九龍寨城公園，貫通整個九龍城。聽講得獎作品最快可以喺今年底或明年初公布。


駁寨城公園 貫通九龍城

土木工程拓展署啟德辦事處專員李關小娟話，今次比賽目的在於集思廣益，收集具創意嘅設計意念，最終得獎作品會拎畀建築署參考。


專業顧問建築師何文堯就話，龍津石橋歷史價值高，惟觀賞價值有限，而且仲要考慮到點樣配合周邊地區未來發展，例如第時港鐵沙中線發展、擬建附近嘅地下購物街等，所以設計都好考工夫。


比賽分專業同公開兩組，專業組要具備註冊建築師同工程師等專業資格，公開組任何人都可參與，評審委員包括古諮會主席林筱魯、建築師羅建中同文化人黃英琦等。即日起至下月18日接受報名，參賽者須提交設計概念圖則，詳情可瀏覽網址www.ltsb-design.hk。