萬聖節多包場迪士尼勁吸客

【明報專訊】仲有一個月就係萬聖節，香港兩大主題公園都會搞萬聖節活動吸客，上年轉虧為盈、入場人次創新高嘅迪士尼率先報喜，話今年萬聖節企業包場晚數比上年增3倍，仲首次安排小企業聯合包場，而且今年夏天部分日子入場人次仲逼近農曆新年高峰。

暑假客量同新春差唔多

3個月前新官上任「o既」香港迪士尼首個華人樂園營運副總裁李登海，噚日好開心咁同Emily講呢個喜訊，佢估計今年「o的」企業賺多「o左」，所以多「o左」公司肯出錢包場，令包場夜「o既」數目比上年大升。佢又話今年好多人數唔夠「o既」細公司查詢包場情況，迪士尼於是將呢「o的」細公司結合埋一齊包場，又為樂園創造新商機。

迪士尼入場人次報捷，Emily就問李登海今年情況，佢話都幾樂觀，暑假部分日子入場人次更貼近4萬，拍得住傳統農曆新年高峰期「o既」人數，但就唔肯透露預料會唔會再破紀錄。