民陣請「漂流」幹事

【明報專訊】民間人權陣線（民陣）年年搞遊行，佢哋噚日就喺facebook刊出招聘廣告，請一名全職或半職組織幹事。做民間團體工作待遇好難奢求什麼，但呢份工特別之處，係指明民陣無辦公室，所以要「不定期到指定地點工作」，如果半職就可以自備電腦喺屋企做嘢。換言之，打呢份工隨時要有做「漂流」幹事嘅心理準備。


民陣列出招聘要求，首要係關心民主政制、人權法治，認識公共政策、時事政治、弱勢社群議題；應徵者要作一篇800字文章，題目係「香港的核心矛盾」。核心價值、深層次矛盾Emily就聽得多，乜嘢叫核心矛盾，就要等有志者自己演繹！廣告無列出薪酬待遇，有興趣可以去民陣facebook睇詳情。